علامہ ابن باز یادوں کے سفر میں

کتاب: علامہ ابن باز یادوں کے سفر میں مصنف: رضوان اللہ ریاضی پبلیشر: الفرقان ٹرسٹ مظفر گڑھ ترجمہ: عرضِ ناشر اَلْحَمْدُ لِلّٰہِ وَحْدَہُ وَالصَّلَاۃُ وَالسَّلَامُ عَلیٰ مَنْ لَّا نَبِیَّ بَعْدَأَمَّا بَعْدُ! اس بات کو کوئی دو سال ہوئے ہوں گے۔ میری نظر سے جناب رضوان اللہ ریاضی کی کتاب ’’رسولِ اکرم صلی اللہ علیہ وسلم کا طرزِ عمل، کس کے ساتھ کیسا؟‘‘ گزری۔ میں نے کتاب کو مختلف زاویے سے دیکھا، کتاب بہت پسند آئی۔ چونکہ میرا بھی رشتہ کتابوں کی طباعت سے جڑا ہوا ہے اور اچھی کتابیں منظر عام پر لانے کی خواہش مجھے ہمیشہ رہتی ہے، اس لیے میں نے مذکورہ کتاب کو بھی اپنے ادارے سے شائع کرنے کی خواہش کی۔ مگر چونکہ مصنف اور مؤلف کی اجازت کے بغیر کتاب شائع کرنا قانوناً اور شرعاً ہر دو اعتبار سے ناجائز اور جرم ہے، اس لیے میں نے جناب ریاضی صاحب سے فون پر رابطہ کیا۔ اتفاق سے وہ اُس وقت انڈیا گئے ہوئے تھے، اس لیے ان سے بات نہ ہو سکی؛ البتہ ان کے چھوٹے بھائی جناب ظفیر احمد سے تفصیلی بات ہوئی اور میں نے انھیں یہ پیغام دے دیا کہ جب ریاضی صاحب سے رابطہ ہو تو ہمارے بارے میں ان سے تذکرہ کریں کہ میں ان کی کتابیں مثلاً ’’غیرت کا فقدان اور اس کا علاج‘‘ اور ’’رسولِ اکرم صلی اللہ علیہ وسلم کا طرزِ عمل، کس کے ساتھ کیسا؟‘‘ وغیرہ اپنے ادارے سے نشر کرنا چاہتا ہوں اور اس کے لیے میں ان سے ملنا چاہتا ہوں۔ چنانچہ ایک دن ہماری اور مؤلف کتاب جناب ریاضی صاحب کی مدینہ منورہ میں میٹنگ ہوئی اور انھوں نے انتہائی شرح صدر کے ساتھ مجھے اپنی یہ دونوں کتابیں شائع کرنے کی اجازت دے دی۔ اس کے لیے میں ان کا تہہ دل سے شکرگزار ہوں کہ انھوں نے میری خواہش اور جذبات کا لحاظ کیا۔ اللہ تعالی انھیں اس کا جزائے خیر عطا فرمائے۔ آمین جناب ریاضی صاحب کی ایک کتاب ’’سفارش کرو، اجر وثواب پاؤ‘‘ حال ہی میں، میں