الصادق الامین

غزوۂ بنی المصطلق بنی مصطلق قبیلۂ بنو خزاعہ أزدیہ کی ایک شاخ ہے جس کا نسب اوس وخزرج کے ساتھ انصار کے جد ثانی (دوسرے دادا) اور مصطلق کے جد رابع (چوتھے دادا) میں ملتا ہے۔ یہ لوگ قدید اور عسفان کے درمیان مکہ سے تقریباً اسّی سے ایک سو بیس کلومیٹر کے فاصلہ پر رہتے تھے۔ اور قبیلۂ خزاعہ کے لوگ مرالظہران (جو مکہ سے تیس کلو میٹر کے فاصلے پر ہے) اور ابواکے درمیان رہتے تھے (جو مکہ سے دو سو چالیس کلومیٹر کی دوری پر ہے)اور خزاعہ کا مسلمانوں کے ساتھ صلح پسندی کا موقف سب کے نزدیک معروف تھا، حالانکہ وہ لوگ مشرک تھے اور مکہ سے قریب رہتے تھے، اور غالباً اس کا سبب انصار کے ساتھ ان کی پرانی رشتہ داری اور بعض دیگر مصالح تھے۔ بنی المصطلق کے لوگ غزوۂ احد سے پہلے مشرکینِ مکہ کے جھوٹے پروپیگنڈوں اور عرب قبائل کو مسلمانوں کے خلاف برانگیختہ کرنے کے سبب دھوکے میں آگئے۔ اسی لیے غزوۂ احد میں قریش کے مختلف الانواع فوجیوں کے درمیان وہ بھی پائے گئے، اسلام کے خلاف ان کا یہ پہلا موقف تھا، اور جب انہوں نے غزوۂ احد میں مسلمانوں کی ہزیمت دیکھی تو دوسرے عرب قبائل کی مانند ان کی بھی جرأت بڑھ گئی۔ سن 5 ہجری ماہ رجب کے اواخر میں رسول اللہ صلی اللہ علیہ وسلم کو خبر ہوئی کہ بنی المصطلق کا سردار حارث بن ابوضراراپنی قوم اوردیگر عربوں کے ساتھ رسول اللہ صلی اللہ علیہ وسلم سے جنگ کرنے کی سوچ رہا ہے۔ اللہ کے ر سول صلی اللہ علیہ وسلم نے حالات کا جائزہ لینے اور اس خبر کی تصدیق کے لیے بریدہ بن الحصیب الاسلمی رضی اللہ عنہ کو بھیجا جنہوں نے جاکر حارث بن ابو ضرار سے ملاقات کی، اوراس سے کہا کہ وہ ان کی مدد کے لیے آیا ہے۔ انہیں دورانِ گفتگو یقین ہوگیا کہ یہ لوگ مدینہ جاکر حملہ کرنے کے لیے ہتھیار اور افراد جمع کررہے ہیں۔ وہ فوراً واپس آئے اور رسول اللہ صلی اللہ علیہ وسلم کو واقعۂ حال سے باخبر کیا۔ رسول اللہ صلی اللہ علیہ وسلم راجح قول کے مطابق سو موار کے دن 2/شعبان سن 5 ہجری کومدینہ منورہ سے سات سو مجاہدین پر مشتمل فوج لے کر چل پڑے، [1] آپ کے ساتھ اس سفر میں امّ المومنین عائشہ اور امّ المومنین امّ سلمہ رضی اللہ عنہما تھیں، مدینہ میں آپ صلی اللہ علیہ وسلم نے زید بن حارثہ رضی اللہ عنہ کو اپنا نائب بنادیا، ایک دوسرے قول کے مطابق ابوذر کو، اور تیسرے قول کے مطابق نمیلہ بن عبداللہ اللیثی رضی اللہ عنہ کو بنایا، اس سفر میں آپؐ کے ساتھ منافقین کی ایک جماعت بھی نکلی، جو اس سے پہلے کسی غزوہ میں نہیں نکلی تھی۔

[1] ۔ یہ قولِ صحیح موسیٰ بن عقبہ کا ہے جسے انہوں نے زہری اور عروہ سے روایت کیا ہے، اور ابو معشر سندھی واقدی اور ابن سعد نے ان کی تائید کی ہے، یہی قول ابن القیم کا ہے جسے انہوں نے زاد المعاد (3/201) میں، اور ذہبی نے تاریخ الاسلام (2/275) میں اور ابن حجر عسقلانی رحمہ اللہ نے نقل کیا ہے۔ اس قول کے صحیح ہونے کی دلیل یہ ہے کہ سعد بن معاذ رضی اللہ عنہ غزوۂ بنی المصطلق میں شریک ہوئے اور غزوۂ بنی قریظہ میں شہید ہوگئے، جو صحیح قول کے مطابق سن 5 ہجری میں ہوا تھا، معلوم ہوا کہ غزوۂ بنی المصطلق غزوۂ بنی قریظہ اور غزوۂ خندق سے پہلے ہوا تھا۔ وباللہ التوفیق۔