الابانہ عن اصول الدیانہ

سے عصمت کا نام خذلان ہے ۔ابن فورک نے اشعری سے نقل کیا ہے کہ مطلق گناہ کی قدرت خذلان نہیں ،کفر کی قدرت خذلان ہے ۔[1] یاد رہے کہ اشعری کے نزدیک استطاعت فعل سے مقارن ہوتی ہے۔معتزلہ کے نزدیک لطف الہی کا نہ ہونا خذلان ہے۔ (لطف کی توضیح آگے آرہی ہے)یاد رہے کہ اہل السنہ والحدیث کے نزدیک لطف اور توفیق ایک ہی چیز ہیں ۔لغوی کہتے ہیں :خذلان عدم توفیق ،اطاعت پر اعانت اور انسان کو اپنے نفس کے ساتھ چھوڑ دینا خذلان ہے ۔[2] امام ابن القیم رحمہ اللہ فرماتے ہیں :عارفین کا اجماع ہے کہ خذلان یہ ہے کہ اللہ کسی شخص کو اس کے نفس کے سپرد کردے ۔[3] یہی بات راجح ہے کہ خذلان عدم نصرت و اعانت ہے جیسا کہ لغوی حنفی رحمہ اللہ نے ذکر کیا ہے پس توفیق اور خذلان کی آپس میں نسبت تقابل العدم والملکۃ ہے ۔توفیق ایجابی ہے، خذلان سلبی ہے،توفیق اللہ کا فضل ہے اور خذلان عدل۔توفیق نیکی پر انسان کی اعانت ہے اور خذلان عدم اعانت ۔ولا حول ولا قوۃ الا بااللّٰہ۔ جارحۃ: جارحۃ آلۂ اکتساب کو کہتے ہیں ،شکاری کتوں اور شکاری باز کو بھی جوارح کہا جاتا ہے ۔انسان کے ہاتھ ،پاؤں ،زبان وغیرہ بھی جوارح ہیں ۔علم کلام میں اس کی بحث اثبات صفات کے ضمن میں آتی ہے ۔اہل السنہ جب یہ کہتے ہیں کہ اللہ کے ہاتھ ہیں ،چہرہ ہے وغیرہ جیسا کہ قرآن و حدیث سے ثابت ہے تو مخالفین کہتے ہیں اس سے یہ لازم آیا کہ اللہ کے بھی جوارح ہیں یعنی آلۂ اکتساب ہے جس سے اللہ پکڑتا ہے وغیرہ اس سے تو تشبیہ اور احتیاج لازم آیا ۔اس کے جواب میں اہل السنہ یہ کہتے ہیں کہ جارحہ کا لفظ قرآن و حدیث سے ثابت نہیں ۔اس لیے ہم اس کا اثبات نہیں کرتے اور نہ یہ لفظ بولنا جائز سمجھتے ہیں ۔[4]

[1] مجرد مقالات الاشعری :۱۲۳ [2] الکلیات:۳۱۰ [3] مدارج السالکین :۱؍۴۱۵ [4] دیکھیۓ الحمویہ لابن تیمیہ