البیان شمارہ 9-10

3. پھر قرآن کے عموم سے اگر حلالۂ معلونہ کے ذریعے نکاح کا جواز ثابت ہے تو پھر شیعوں کا نکاح متعہ بھی جائز ہونا چاہیے، کیونکہ قرآن کے عموم سے آپ اس کو کس طرح خارج کریں گے؟ حدیث کے ذریعے سے تو یقیناً نکاح متعہ خارج ہوسکتاہے، حرام قرار پاسکتاہے کیونکہ حدیث قرآن کی مخصّص ہے ، قطع نظر اس کے کہ وہ حدیث متواتر ہے یا خبر واحد، صرف اس کا صحیح ہوناشرط ہے لیکن اگر حدیث کو عموم قرآن کا مخصّص نہیں ماناجائے گا تو صرف نکاح حلالۂ ملعونہ ہی جائز نہیں ہوگا بلکہ نکاح متعہ بھی جائز ہوگا اور عارضی نکاح بھی جائز ہوگا جو آجکل بعض حضرات نے تعلیمی ضرورت پوری کرنے کے لیے جائز قرار دیاہے۔ اسی طرح ہمارے پاک وہند میں ایک فراہی گروہ ہے جس کو پاکستان میں غامدی گروہ بھی کہاجاتاہے ۔ یہ گروہ بھی اپنے نظریات کے خلاف احادیث کو نہیں مانتا۔ اس لیے یہ گروہ بھی اس حدیث کو نہیں مانتا جس میں دوسرے خاوند کے لیے ہم بستری کو ضروری قرار دیا گیاہے چنانچہ یہ گروہ [تنکح] کے عموم سے استدلال کرتے ہوئے صرف عقد نکاح کے بعد ہی(ہم بستری کے بغیر) طلاق دے دینے کے بعد زوج اول سے نکاح کو جائز قرار دیتاہے۔ عموم کی منطق سے انکار حدیث پر مبنی یہ گمراہانہ نظریہ بھی صحیح ہوگا۔ 4.... مآخذ شرعیہ میں ، قرآن کریم کے بعد سب سے بڑا اور دوسرا ماخذ حدیث نبوی ہے اور احادیث کا بیشتر حصہ ، بلکہ 98 فی صد حصہ احادیث آحاد پر مشتمل ہے اگر احادیث آحاد کی صحت وحجیت ۔نعوذ باللہ۔ مشکوک ہے تو دین کی بنیاد ہی منہدم ہوجاتی ہے اس لیے فقیہ الامت ، امیر المؤمنین فی الحدیث امام بخاری رحمہ اللہ نے صحیح البخاری میں ’’کتاب اخبار الآحاد‘‘ میں اس مسئلے یعنی حجیت خبر واحد کو نہایت مدلل طریقے سے بیان کرکے اس کی خصوصی اہمیت کو اجاگر اور ثابت کیا ہے اور بتلایا ہے کہ حدیث صحیح مطلقاً حجت ہے اور اس سے قرآن کے عموم کی تخصیص بھی بالکل صحیح ہے۔ مولانا تقی عثمانی صاحب فرماتے ہیں : 5.’’ اس کے علاوہ سیدنا ابن عمر رضی اللہ عنہما کے قول میں زنا کے ساتھ اس عمل کی تشبیہ صرف حرمت میں ہے عدم انعقاد میں نہیں جس کی تائید اس سے بھی ہوتی ہے کہ سیدنا ابن عمر رضی اللہ عنہما نے اس معاملے میں زوجین کو تفریق کا کوئی حکم نہیں دیا۔‘‘ (درس ترمذی)