البیان شمارہ 9-10

اُسوۂ محمدی کا ایک صفحہ یہ کتاب کے باب (95 ) کا عنوا ن ہے ۔ اور اس باب میں (45) ذیلی عنوان ہیں اور یہ باب صفحہ 699 تا 713 تک محیط ہے۔ اس باب کے چند ایک ذیلی عنوانات کے بارے میں مولانا کے ارشادات پیش خدمت ہیں اور یہ مکمل باب مولانا آزاد کے قلم سے ہیں ۔ ( صفحہ :713) اسوۂ حسنہ مولانا لکھتے ہیں : مذہب کی قوت احتساب ان تمام چیزوں سے بالاتر ہے یہی وجہ ہے کہ اللہ تعالیٰ نے ہم پر آنحضرت صلی اللہ علیہ وسلم کا اتباع فرض کرکے ہم کو پوری دنیا کی مادی واخلاقی غلامی سے آزاد کر دیا ہے۔ ﴿ لَقَدْ كَانَ لَكُمْ فِي رَسُولِ اللّٰه أُسْوَةٌ حَسَنَةٌ ﴾ ( الاحزاب:21) ’’یقیناً تمارے لیے اللہ کے رسول کی زندگی میں پیروی واتباع کا بہترین نمونہ رکھا گیاہے۔‘‘ اللہ تعالیٰ نے یہ نہیں فرمایا کہ تم رسول اللہ صلی اللہ علیہ وسلم کی تقلید کرو کیونکہ ایک شخص کی تقلید کرنے سے دوسرے اشخاص کی تقلید کی نفی نہیں ہوجاتی ،بلکہ یہ فرمایا تمہاری تقلید صرف پاک ذات میں محدود ہے کیونکہ تمہیں اعمال صالحہ کا یہ خزانہ دوسری جگہ نہیں مل سکتا۔ اس طرز بیان سے نہ صرف جناب رسول اللہ صلی اللہ علیہ وسلم کا اتباع لازم کردیا گیا بلکہ ساتھ ہی دوسرے تمام بڑے بڑے انسانوں کی اتباع کی نفی بھی کردی اس لیے کہ صرف ایک ہی آفتاب ہے جس کی روشنی ظلمتِ زاردنیا کی ہر اندھیری اور ہر تیرہ تاریک راہ میں ہماری رہنمائی کرسکتی ہے؎ جو غلام آفتابم ہمہ ز آفتاب گویم نہ شبم نہ شب پرستم کہ حدیث خواب گویم (صفحہ :699) آیات واحادیث : اسی آفتاب کی روشنی سے اور سیارے بھی روشنی حاصل کرتے ہیں اس لیے ان کا اتباع بھی ہم پر واجب ہوجاتاہے۔