البیان شمارہ 9-10

اور اس کی ابتداء شک اور تردد سے کیا کرتے تھے اور جب تک یقین کرنے کے لیے مجبور نہ ہوجائیں یقین نہیں کرنا چاہتے تھے۔ اس چیز نے اُن کی عملی زندگی کو بھی(یعنی کاروبار وانتظامات کی زندگی کو)بہت نقصان پہنچایا اور وہ کوئی عملی کام جم کر نہ کر سکے۔ ندوہ کے معاملے میں جو الجھاؤ لوگوں نے ڈالے وہ اُن کے اسی ضعیف یقین وعدم حزم صلابت ارادہ کا نتیجہ تھا ورنہ اُن سے مخالفت کرنے والوں میں ایک شخص بھی ایسا نہ تھا جو اُن کو اُن کی جگہ سے ہٹا سکتا۔ بہر حال اُنہوں نے اس خیال پر بہت ہی پسندیدگی ظاہر کی مگر وہی اپنی عادت کے مطابق اظہار شک ونااُمیدی کہ اتنا مواد صرف قرآن سے کہاں نکل سکتاہے کہ سیرت کا ایک باب مرتب ہوسکے لیکن جب میں نے بہت اصرار کیا تو کہا : اچھا تم اگر یہ ٹکڑا مرتب کردو تو سیرت کے ساتھ شامل کر دیاجائے ۔ آخری یکجائی دہلی میں ہوئی تھی اس وقت انہوں نے کہا : ’’اب مجھ کو بھی خیال ہوجاتاہے کہ یہ ممکن ہے اور بہت ہی اہم چیز ہوگی۔‘‘ چنانچہ دہلی سے آکر میں نےکچھ وقت اس میں صرف کیا اور ایک مستقل سیرت نبویہ مجرد قرآن کریم سے ماخوذ ومستنبط شروع کردی ۔ جوں جوں قدم آگے بڑھتا گیا۔ نئے نئے دروازے کھلتے گئے اوراُمید وتوقع سے کہیں زیادہ کامیابی ہوئی ۔ گویہ حقیقت پہلے سے پیش نظرتھی حتیٰ کہ اس بارے میں بڑا ذخیرہ آیا ت کا ذہن میں مستحضر تھا لیکن یہ بات تو کبھی وہم وگمان میں بھی نہیں گزری تھی کہ جس کتاب کو بظاہر جابجا ذکر احکام ومسائل وقصص گزشتگان سے مملوء پاتے ہیں اس میں اس قدر وافر ذخیرہ خاص شخص رسالت کے حالات ووقائع کا بھی موجود ہوگا ۔ کتاب کے مرتب ہوجانے کے بعد جو دیکھا تو ایک عجیب عالم نظر آیا، حیات وسیرت کا کوئی ضروری ٹکڑا ایسا نہیں ہے جس کے لیے قرآن میں ایک سے زیادہ آیات نہ ہوں اور پھر نہ صرف آنحضرت صلی اللہ علیہ وسلم کی سیرت بلکہ صحابہ کرام کے حالات وخصائص کا بھی کافی ذخیرہ موجود ملا۔ [1] نوٹ : مولانا ابو الکلام آزاد کے پرائیویٹ سکریٹری محمد اجمل خان نے ایک کتاب بنام ’’سیرت قرآنیہ سیدنا رسول عربی صلی اللہ علیہ وسلم ‘‘ مرتب کی۔ اس کتاب کا تعارف مقالہ کے آخر میں مولانا کی تصانیف کے بعد ان شاء اللہ آپ ملاحظہ فرمائیں گے۔ (عراقی)

[1] تذکرہ ، ص:204۔205 ، مطبوعہ مکتبہ جمال لاہور ، 1999ء