اخلاق نبوی کے سنہرے واقعات

بستی میں یہی ابوسفیان بن حارث اپنے بیٹے جعفر کے ہمراہ حاضر خدمت ہوتا ہے اور آپ صلی اللہ علیہ وسلم کے پھوپھی زاد بھائی عبداللہ بن ابو امیہ بھی آجاتے ہیں۔ ان دونوں نے اللہ کے رسول صلی اللہ علیہ وسلم کو بہت زیادہ ستایا تھا۔ یہ بڑے قریبی رشتے دار تھے مگر دونوں ہی زندگی بھر سخت دشمن رہے۔ اب یہ دونوں نادم ہیں، اپنے بے شمار جرائم کی معافی چاہتے ہیں۔ ان کی خواہش ہے کہ کسی طرح اللہ کے رسول صلی اللہ علیہ وسلم سے ملاقات ہو اور آپ سے معافی مانگ لیں۔ اللہ کے رسول صلی اللہ علیہ وسلم نے شرف باریابی نہ بخشا کیونکہ آپ صلی اللہ علیہ وسلم نے ان دونوں سے بہت تکلیفیں اٹھائی تھیں۔ دور جاہلیت کے ایک عرب شاعرطرفہ بن عبد نے ایسے ہی موقع کے لیے کہا تھا: وَظُلْمُ ذَوِي الْقُرْبَی أَشَدُّ مَضَاضَۃً عَلَی الْمَرْئِ مِنْ وَقْعِ الْحُسَامِ الْمُہَنَّدِ ’’قریبی رشتے داروں کے ظلم کی آدمی کو بہت زیادہ تکلیف ہوتی ہے۔ یہ اس کے لیے تیز دھار تلوار کے وار سے بھی زیادہ پریشان کن ہوتا ہے‘‘۔ اس لیے کہ رشتہ دار سے مدد اور تعاون کی امید ہوتی ہے لیکن اگر وہ ا س کے بجائے دشمنی پر اتر آئے اور اذیت دینے لگ جائے تو آدمی کو بے حد دکھ ہوتا ہے۔ اس موقع پر ام المؤمنین سیدہ ام سلمہ رضی اللہ عنہا ان دونوں کی سفارش کر رہی ہیں۔ ان میں عبداللہ بن ابی امیہ ان کے بھائی تھے۔ ہماری یہ اماں جان بہت بڑے باپ کی نہایت سمجھدار بیٹی تھیں۔ اللہ کے رسول صلی اللہ علیہ وسلم سے عرض کر رہی ہیں:اللہ کے رسول! ایک آپ کا چچازاد اور دوسرا پھوپھی زاد بھائی ہے، آپ ان سے ملاقات کر لیں۔