کتاب: ایک ہزار منتخب احادیث ماخوذ از بخاری شریف - صفحہ 9
4۔ اور آپ صلی اللہ علیہ وسلم کی صفات (حلیہ، اخلاق، کردار وغیرہ) ’’ صفتی حدیث ‘‘ کہلاتی ہے۔
اقسامِ حدیث (اختصار کے ساتھ)
1۔ صحیح: جس کے تمام راوی ثقہ پرہیز گار اور قابل اعتبار حافظہ کے مالک ہوں اور سند متصل ہو۔ (متصل کے معنی ’’لگاتار‘‘ ہیں یعنی سند شروع سے آخیر تک ملی ہوئی ہو کوئی راوی گرا ہوا نہ ہو)
2۔ حسن : جس کے راوی صحیح حدیث کے راویوں کی نسبت حافظہ میں تو کم ہوں باقی دو شرائط (ثقہ و پرہیزگاری اور سند متصل) صحیح حدیث والی موجود ہوں۔ ﴿ثقہ کے معنیٰ ہیں ’’معتبر‘‘﴾
3۔ژ مرفوع : جس حدیث میں صحابی رسول اﷲ صلی اللہ علیہ وسلم کا نام لے کر حدیث بیان کرے مرفوع کہلاتی ہے۔
4۔موقوف: جس حدیث میں صحابی رسول اﷲ صلی اللہ علیہ وسلم کا نام لئے بغیر حدیث بیان کرے یا اپنے خیال کا اظہار کرے موقوف کہلاتی ہے۔
5۔ آحاد : جس حدیث کے راوی تعداد میں متواتر حدیث کے راویوں سے کم ہوں آحاد کہلاتی ہے۔ آحاد کی تین قسمیں ہیں۔ (۱) ’’مشہور‘‘﴿جس حدیث کے راوی ہر زمانے میں دو سے زائد رہے ہوں۔ (۲) ’’عزیز‘‘جسکے راوی کسی زمانے میں کم سے کم دو رہے ہوں اور(۳) ’’غریب‘‘ جس حدیث کے راوی کسی زمانے میں ایک رہا ہو اور ہر راوی ثقہ، پرہیز گار، قابل اعتبار حافظہ کا مالک ہو اور سند متصل ہو﴾
6۔ متواتر : جس حدیث کے راوی ہر زمانے میں اتنے ہوں جن کا جھوٹ پر اکٹھے ہونا ممکن نہ ہو۔
7۔ مقبول : جس حدیث کے راویوں کی دیانت اور سچائی تسلیم ہو، مقبول کہلاتی ہے۔
8۔ غیر مقبول: جس حدیث کے راویوں کی دیانت اور سچائی مشتبہ ہو، غیر مقبول کہلاتی ہے۔
9۔ ضعیف: جس حدیث میں نہ تو صحیح حدیث کی شرائط موجود ہوں اور نہ ہی حسن کی۔ یعنی جس حدیث کے راویوں میں کوئی راوی کم فہم، بد حافظہ ہو یا سند میں ایک یا زیادہ راوی محذوف (کئے گئے) ہوں۔
10۔ موضوع (من گھڑت) : جس حدیث کا (کوئی ایک بھی) راوی کذاب (بہت جھوٹا) ہو۔