اگر تم مومن ہو

خلیفہ مقرر کرنے سے پہلے مجوزہ شخص پر اتفاقِ امت کی شرط بعض لوگ کہتے ہیں کہ خلیفہ مقرر کرنے کیلئے ضروری ہے کہ پہلے ساری امت خلیفہ کیلئے مجوزہ شخص پر متفق ہو چکی ہو۔ یہ شرط رکھنے والوں سے سوال ہے کہ اﷲکی شریعت میں اگر یہ چیز شرط ہے تو لمبا عرصہ گزر چکا تھا خلافت کو ختم ہوئے ، آپ لوگ کسی ایک شخص پر متفق کیوں نہیں ہو گئے؟ جواب میں عام طور پر یہی کہا جاتا ہے کہ ہم نے تو ایک بہترین لیڈر پیش کیا تھا (جماعتوں سے وابستہ لوگ اپنے اپنے لیڈر کا نام لیتے ہیں) لوگ اس پر متفق نہیں ہوئے تو یہ لوگوں کا قصور ہے۔ ’’بعض لوگوں کے پسندیدہ لیڈر’‘ پر تمام لوگ متفق نہیں ہوئے تو یہ لوگوں کا قصور نہیں بلکہ یہ فطرت کا تقاضاہ ہے کیونکہ:۔ 1۔اختلاف انسانوں کی فطرت میں داخل ہے جیسا کہ اﷲتعالیٰ کا ارشاد ہے کہ:۔ ﴿ وَلَوْ شَآئَ رَبُّکَ لَجَعَلَ النَّاسَ اُمَّۃً وَّاحِدَۃً وَّلَا یَزَالُوْنَ مَخْتَلِفِیْنَo اِلَّا مَنْ رَّحِمَ رَبُّکَ وَکَذٰلِکَ خَلَقَھُمْ﴾ [ھود:118…119] ’’ اگر تیرا رب چاہتا تو تمام انسانوں کو ایک ہی جماعت بنا دیتا مگر وہ ہمیشہ اختلاف کرتے رہیں گے مگر جن پر رحمت ہو تیرے رب کی اور اسی (امتحان) کیلئے اس نے پیدا کیا ہے انہیں۔‘‘ 2۔اہل ایمان اگر کسی چیز پر متفق رہ سکتے ہیں تو وہ صرف اﷲاور اس کے رسول کی بات ہے اور اگر وہ تنازعے میں مبتلا ہو جائیں تو جس بات پہ وہ دوبارہ متفق ہو سکتے ہیں وہ بھی صرف اﷲاور اس کے رسول کی بات ہے۔