اگر تم مومن ہو

ایک سے زیادہ حاملینِ شرائط خلافت کے ہاتھ پر بیعت ہو جائے تو جس کے ہاتھ پر سب سے پہلے کسی ایک مومن نے بیعت کی ہو وہ ’’پہلی بیعت ہے‘‘ اور اس پہلی بیعت کا حامل اس بیعت کے منعقد ہونے کے وقت سے خلیفہ قرار پا جاتا ہے جیسا کہ ابوبکر رضی اللہ عنہ اپنے ہاتھ پہ عمر رضی اللہ عنہ کی بیعت کرنے سے خلیفہ قرار پا گئے۔ ابوبکر رضی اللہ عنہ سقیفہ بنی سعدہ میں داخل ہونے سے پہلے خلیفہ نہ تھے اور آپ کی موجودگی کے باوجود افرادِ امت خلافت کے حوالے سے تین مختلف آراء رکھتے تھے لیکن جونہی آپ کے ہاتھ پر عمر رضی اللہ عنہ نے بیعت کر لی اس پہلی بیعت کے حامل ہونے کے ساتھ ہی آپ خلیفہ قرار پا گئے اور بقیہ افرادِ اُمت کیلئے لازم ہو گیا کہ پہلی بیعت کے حامل اس شخص کی بیعت کر کے اپنا اقتدار اس کے سپرد کر دیں۔ حاملِ شرائط خلافت پہلی بیعت کے ساتھ عہدہِ خلیفہ کا حامل ہو کر ’’خلیفہ‘‘ قرار پانے کی بنا پر درج ذیل چیزوں کا حامل ہو جاتا ہے۔ ٭سیاستِ اُمّہ کا ذمہ دار قرار پا جاتا ہے۔ ٭تمام مسلمانوں کا امیر، امام اور سلطان قرار پا جاتا ہے۔ ٭تمام مسلمانوں کی امارت، امامت و سلطنت کا وارث قرار پا جاتا ہے۔ ٭تمام مسلمانوں کے حقوقِ وفاداری کا حقدار ہوجاتا ہے۔ ٭تمام مسلمانوں پر لازم ہو جائے گا کہ اس کے حقوقِ وفاداری اسے دیتے ہوئے اپنی امارت ، امامت اور سلطنت اس کے سپرد کر دیں اور اپنی امارت، امامت اور سلطنت کے اصولاً خلیفہ (وارث) قرار پائے گئے شخص کو عملاً خلیفہ بنا دیں۔