آفات نظر اور ان کا علاج

’’یعنی ان میں سے بہت سے لوگ ایسے ہیں جو تیری باتیں سنتے ہیں مگر کیا تو بہروں کو سنائے گا خواہ وہ کچھ نہ سمجھتے ہوں ؟اور ان میں سے بہت سے لوگ وہ ہیں جو تجھے دیکھتے ہیں مگر کیا تو اندھوں کو راہ بتائے گا خواہ انہیں کچھ نہ سوجھتا ہو ‘‘ ان آیا ت میں قوت سماع کے ضائع ہونے سے عقل کے چلے جانے کا ذکر ہے مگر نظر کے جانے سے صرف بینائی کے جانے کا ذکر ہے جو اس بات کی دلیل ہے کہ کان افضل ہیں۔لیکن امام ابن الانباری فرماتے ہیں کہ یہ استدلال درست نہیں۔کان آنکھ سے افضل کیونکر ہو سکتے ہیں۔جبکہ آنکھ کی بدولت انسان بآسانی چلتا پھر تا ہے۔منزل کو بآسانی پالیتا ہے اور ہلاکت وبربادی کی جگہ سے بآسانی بچ نکلتا ہے۔چہرے کی خوبصورتی اور رونق اسی سے ہے۔اور حدیث میں آنکھ ہی کے بارے میں فرمایا گیا ہے کہ جس کی میں (اللہ عزو جل )دونوں آنکھوں کی بینائی ختم کر دوں وہ اس پر صبر کرے تو اس کی جزا جنت ہے۔یہ بشارت قوت سماعت چلے جانے پر قطعا نہیں جوا س کی دلیل ہے کہ آنکھ افضل ہے۔ نیز فرماتے ہیں کہ ابن قتیبہ نے جس آیت سے استدلال کیا ہے وہ استدلال بھی درست نہیں کیونکہ نظر کے جانے سے صرف بینائی کے چلے جانے کا ہی ذکر نہیں بلکہ ﴿ لَا یُبْصِرُوْنَ﴾سے مراد بصارت قلبی سے محرومی ہے۔جیسے سماعت کے فقد ا ن سے ﴿لَا یَعْقِلُوْنَ﴾بے وقوفی کا ذکر ہے۔(ویسے بھی سر کی آنکھیں کھلی ہونے سے چند ا ں فائدہ نہیں ہوتا جانور بھی تو آنکھ سے دیکھتا ہے اصل دل کی آنکھوں کا کھلا ہونا یعنی بصیرت مراد ہے اسی لئے نفی یَنْظُرُوْنَکی نہیں ﴿لاَ یُبْصِرُوْنَ﴾ کی ہے پھر اس آیت میں اگر کانوں کا ذکر پہلے ہے تو اس سے بھی ان کا افضل ہونا ثابت نہیں ہو تا کیونکہ ایک دوسرے مقام میں آنکھوں کا ذکر پہلے ہے چنانچہ ارشاد ہوتا ہے : ﴿ مَثَلُ الْفَرِیْقَیْنِ کَالْاَعْمٰی وَاْلاَصَمِّ وَالْبَصِیْرِ وَالسَّمِیْعِ﴾ (ھود:۲۴) ’’ان دونوں فریقوں کی مثال ایسی ہے جیسے ایک آدمی اندھا بہر اہو اور دوسرا دیکھنے اور سننے والا ہو۔ کیا یہ دونوں برابر ہو سکتے ہیں۔؟‘‘