آفات نظر اور ان کا علاج

اور خود بھی روزانہ رات کو سوتے وقت ہر آنکھ میں تین تین سلائیاں سرمے کی ڈالتے تھے۔(ترمذی وغیرہ )امام ترمذی رحمہ اللہ نے اسے حسن قرار دیا ہے۔مگر یہ روایت حسن نہیں بلکہ سخت ضعیف ہے اس کے برعکس حضرت انس رضی اللہ عنہ فرماتے ہیں کہ رسول اللہ صلی اللہ علیہ وسلم دائیں آنکھ میں تین بار اور بائیں آنکھ میں دو بار سرمہ ڈالتے تھے یعنی تین سلائیاں دائیں میں اور دو بائیں آنکھ میں۔علامہ البانی نے (السلسلۃ الصحیحۃ رقم ۶۳۶)میں اسے ذکر کیا ہے اور ترمذی وغیرہ میں حضرت ابن عباس رضی اللہ عنہما کی سابقہ روایت پر تفصیلا نقد کیا ہے۔ سیاہ سرمہ ہر دور میں نظر کی تقویت اور آنکھ سے ردی مواد کے اخراج کا سبب سمجھا گیا ہے۔ اس سلسلے میں آنحضرت صلی اللہ علیہ وسلم نے ’’اثمد‘‘کی بڑی تعریف کی ہے اور فرمایا ہے کہ یہ آنکھوں کو جلا بخشتا ہے اور پلکوں کو اگاتاہے۔(ابو داؤد،ترمذی،فی الشمائل وغیرہ) حافظ ابن قیم نے لکھا ہے کہ ’’اثمد‘‘وہ سیاہ پتھر ہے جو اصفھان سے آتاہے اور مغرب سے بھی یہ درآمد کیا جاتاہے۔اس کا مزاج سرد خشک ہے اور بینائی کو طاقت دیتا ہے بالخصوص جبکہ اس کے ساتھ کچھ کستوری بھی ملالی جائے۔آنحضرت صلی اللہ علیہ وسلم نے بھی فرمایا ہے کہ سوتے وقت کستوری ملا ہوا اثمد سرمہ لگاؤ(زاد المعاد)اسی طرح رسول ا للہ صلی اللہ علیہ وسلم نے نے ’’کماۃ‘‘یعنی کھنبی کے پانی کو آنکھ کے لئے شفا فرمایا ہے امام نووی رحمہ اللہ نے لکھا ہے اس کا مجرد پانی فی الواقعہ شفا ہے۔میں نے خود اس کا تجربہ کیاہے ہمارے زمانے میں بعض نابینا حضرات نے بھی اس کا تجربہ کیا جس سے اللہ تعالیٰ نے ان کی بینائی درست فرما دی اور وہ شیخ کمال دمشقی ہیں جو حدیث کے استاد ہیں انہوں نے سچے اعتقاد سے کھنبی کا پانی آنکھوں میں ڈالا تو اللہ تعالیٰ نے ان کی بینائی بحال کر دی۔اور بعض نے کہاہے کہ اسے بعض دیگر ادویہ کے ہمراہ استعمال کرنا چاہییٔ۔آنکھ کی حفاظت کا ایک تقاضا یہ بھی ہے کہ اسے آرام بہم پہنچایا جائے۔ٹیلی ویژن،وی سی آر وغیرہ کو دیکھنے کے لئے مسلسل بیدار رہنا تو کجا ہمیشہ شب بھر عبادت میں وقت صرف کرنے کا عزم کرنے والے صحابی سے بھی آنحضرت صلی اللہ علیہ وسلم نے فرمایا تھا۔’’وَلِعَیْنِکَ عَلَیْکَ حَقٌّ‘‘کہ تیرے اوپر تیری آنکھ کا حق ہے اس لئے اللہ تعالیٰ کی اس نعمت کی قدر کرنا چاہییٔ اور اس کی حفاظت کے لئے کوئی