سورة ھود - آیت 23

إِنَّ الَّذِينَ آمَنُوا وَعَمِلُوا الصَّالِحَاتِ وَأَخْبَتُوا إِلَىٰ رَبِّهِمْ أُولَٰئِكَ أَصْحَابُ الْجَنَّةِ ۖ هُمْ فِيهَا خَالِدُونَ

ترجمہ ترجمان القرآن - مولانا ابوالکلام آزاد

لیکن جو لوگ ایمان لائے، نیک کام کیے اور اپنے پروردگار کی طرف قرار پکڑ لیا تو وہ جنت والے ہیں، جنت کی (کامرانیوں) میں ہمیشہ رہنے والے۔

تفسیر تیسیر الرحمن لبیان القرآن - محمد لقمان سلفی صاحب

(١٧) آیات (١٥، ١٦، ١٧) میں بیان کیا جاچکا ہے کہ طالب دنیا اور طالب آخرت برابر نہیں ہوسکتے ہیں، یہاں آیت (١٨) سے لے کر (٢٤) تک اسی بات کو دوسرے انداز میں بیان کیا گیا ہے۔ پہلے افترا پرداز کفار و مشرکین کا حال بیان کیا گیا ہے، اور اب اہل ایمان کا ذکر خیر ہورہا ہے، اور آیت (٢٤) میں اندھے اور بہرے اور آنکھ اور کان والے کی مثال دے کر بتایا جارہا ہے کہ جس طرح یہ لوگ برابر نہیں ہوسکتے ہیں، اسی طرح طالب دنیا اور طالب آخرت ہرگز برابر نہیں ہوسکتے ہیں۔