سورة الشعراء - آیت 169

رَبِّ نَجِّنِي وَأَهْلِي مِمَّا يَعْمَلُونَ

ترجمہ فہم القرآن - میاں محمد جمیل

اے پروردگار مجھے اور میرے اہل وعیال کو ان کے برے کاموں سے نجات دے۔ (١٦٩)

تفسیر تیسیر القرآن - مولانا عبدالرحمٰن کیلانی

[١٠١] حضرت لوط علیہ السلام اور آپ کےمعدودے چندپیروکار اس اوباش اور گندے قسم کے معاشرے سے سخت بیزار تھے۔ جب لوط علیہ السلام ان لوگوں کے راہ راست پر آنے سے مایوس ہوگئے اور ان کی سرکشی بڑھتی ہی گئی تو اس وقت آپ نے سخت اضطراب کے عالم میں اللہ سے دعا کی کہ ہم اب زیادہ دیر اس اوباش سوسائٹی میں نہیں رہ سکتے لہٰذا ان لوگوں سے ہماری نجات کی کوئی صورت پیدا فرما دے۔