صدقات اور اعمال صالحہ جہنم سے نجات کے ضامن ہیں ابن عمر رضی اللہ عنہما فرماتے ہیں ” «عَقَبَۃَ» جہنم کے ایک پھسلنے پہاڑ کا نام ہے “ ۔ کعب احبار رحمہ اللہ فرماتے ہیں ” اس کے جہنم میں ستر درجے ہیں “ ۔ قتادہ رحمہ اللہ فرماتے ہیں کہ ” یہ داخلے کی سخت گھاٹی ہے اس میں اللہ تعالیٰ کی فرمانبرداری سے داخل ہو جاؤ پھر اس کا داخلہ بتایا یہ کہہ کر کہ تمہیں کس نے بتایا کہ یہ گھاٹی کیا ہے ؟ تو فرمایا غلام آزاد کرنا اور اللہ کے نام کھانا دینا “ ۔ ابن زید رحمہ اللہ فرماتے ہیں مطلب یہ ہے کہ ” یہ نجات اور خیر کی راہوں میں کیوں نہ چلا ؟ پھر ہمیں تنبیہ کی اور فرمایا ’ تم کیا جانو «عَقَبَۃَ» کیا ہے ؟ ‘ آزادگی گردن یا صدقہ طعام «فَکٰ رَقَبَۃٍ» جو اضافت کے ساتھ ہے اسے «فَکَّ رَقَبَۃً» بھی پڑھا گیا یعنی فعل و فاعل دونوں قرأتوں کا مطلب قریباً ایک ہی ہے ۔ مسند احمد میں ہے { رسول اللہ صلی اللہ علیہ وسلم فرماتے ہیں کہ جو کسی مسلمان کی گردن چھڑوائے اللہ تعالیٰ اس کا ہر ایک عضو اس کے ہر عضو کے بدلے جہنم سے آزاد کر دیتا ہے یہاں تک کہ ہاتھ کے بدلے ہاتھ پاؤں کے بدلے پاؤں اور شرمگاہ کے بدلے شرمگاہ } ۔ علی بن حسین یعنی امام زید العابدین رحمہ اللہ نے جب یہ حدیث سنی تو سعید بن مرجانہ رحمہ اللہ راوی حدیث سے پوچھا کہ کیا تم نے خود سیدنا ابوہریرہ رضی اللہ عنہ کی زبانی یہ حدیث سنی ہے ؟ آپ نے فرمایا : ہاں تو آپ نے اپنے غلام سے فرمایا کہ مطرف کو بلا لو جب وہ سامنے آیا تو آپ نے فرمایا جاؤ تم اللہ کے نام پر آزاد ہو ۔ ۱؎ (صحیح بخاری:2517) بخاری ، مسلم ، ترمذی اور نسائی میں بھی یہ حدیث ہے صحیح مسلم میں یہ بھی ہے کہ یہ غلام دس ہزار درہم کا خریدا ہوا تھا اور حدیث میں ہے کہ { جو مسلمان کسی مسلمان غلام کو آزاد کرے اللہ تعالیٰ اس کی ایک ایک ہڈی کے بدلے اس کی ایک ایک ہڈی جہنم سے آزاد ہو جاتی ہے } ۔ ۱؎ (سنن ابوداود:3965،قال الشیخ الألبانی:صحیح) مسند میں ہے { جو شخص اللہ تعالیٰ کے ذکر کے لیے مسجد بنائے اللہ تعالیٰ اس کے لیے جنت میں گھر بناتا ہے اور جو مسلمان غلام کو آزاد کرے اللہ تعالیٰ اسے اس کا فدیہ بنا دیتا ہے اور اسے جہنم سے آزاد کر دیتا ہے جو شخص اسلام میں بوڑھا ہو اسے قیامت کے دن نور ملے گا } ۔ ۱؎ (مسند احمد:386/4:صحیح) اور روایت میں یہ بھی ہے کہ { جو شخص اللہ کی راہ میں تیر چلائے خواہ وہ لگے یا نہ لگے اسے اولاد اسمٰعیل میں سے ایک غلام کے آزاد کرنے کا ثواب ملے گا } ۔ ۱؎ (سنن ابوداود:3966،قال الشیخ الألبانی:صحیح) اور حدیث میں ہے { جس مسلمان کے تین بچے بلوغت سے پہلے مر جائیں اسے اللہ تعالیٰ اپنے فضل و کرم سے جنت میں داخل کرے گا اور جو شخص اللہ کی راہ میں جوڑے دے ، اللہ تعالیٰ اس کے لیے جنت کے آٹھوں دروازے کھول دے گا جس سے چاہے چلا جائے } ۔ ۱؎ (مسند احمد:386/4:صحیح لغیرہ) ان تمام احادیث کی سندیں نہایت عمدہ ہیں ۔ ابوداؤد میں ہے کہ { ایک مرتبہ ہم نے سیدنا واثلہ بن اسقع رضی اللہ عنہ سے کہا کہ ہمیں کوئی ایسی حدیث سنائیے جس میں کوئی کمی زیادتی نہ ہو تو ، آپ بہت ناراض ہوئے اور فرمانے لگے تم میں سے کوئی پڑھے اور اس کا قرآن شریف اس کے گھر میں ہو تو کیا وہ کمی زیادتی کرتا ہے ؟ ہم نے کہا ہمارا مطلب یہ نہیں ہم تو یہ کہتے ہیں کہ رسول اللہ صلی اللہ علیہ وسلم سے سنی ہوئی حدیث ہمیں سنائیے ، آپ نے فرمایا : ہم ایک مرتبہ رسول اللہ صلی اللہ علیہ وسلم کی خدمت میں اپنے ایک ساتھی کے بارے میں حاضر ہوئے جس نے قتل کی وجہ سے اپنے اوپر جہنم واجب کرلی تھی تو آپ صلی اللہ علیہ وسلم نے فرمایا : ” اس کی طرف سے غلام آزاد کرو ، اللہ تعالیٰ اس کے ایک ایک عضو کے بدلے اس کا ایک ایک عضو جہنم کی آگ سے آزاد کر دے گا “ } ۔ ۱؎ (سنن ابوداود:3964،قال الشیخ الألبانی:ضعیف) ، یہ حدیث نسائی شریف میں بھی ہے ۔ اور حدیث میں ہے { جو شخص کسی کی گردن آزاد کرائے اللہ تعالیٰ اسے اس کا فدیہ بنا دیتا ہے } ۔ ۱؎ (مسند احمد:150/4:صحیح لغیرہ وہذا اسناد ضعیف لا نقطاعہ) ایسی اور بھی بہت سی حدیثیں ہیں ۔ مسند احمد میں ہے کہ { ایک اعرابی رسول اللہ صلی اللہ علیہ وسلم کے پاس آیا اور کہنے لگا اے اللہ کے رسول! کوئی ایسا کام بتا دیجئیے جس سے میں جنت میں جا سکوں ؟ آپ صلی اللہ علیہ وسلم نے فرمایا : ” تھوڑے سے الفاظ میں بہت ساری باتیں تو پوچھ بیٹھا ، «نسمہ» آزاد کر ، «رقبتہ» چھڑا “ ، اس نے کہا کیا یہ دونوں ایک چیز نہیں ؟ آپ صلی اللہ علیہ وسلم نے فرمایا : ” نہیں «نسمہ» کی آزادی کے معنی تو ہیں اکیلا ایک غلام آزاد کرے اور «فَکٰ رَقَبَۃٍ» کے معنی ہیں کہ تھوڑی بہت مدد کرے ، دودھ والا جانور دودھ پینے کے لیے کسی مسکین کو دینا ، ظالم رشتہ دار سے نیک سلوک کرنا ، یہ جنت کے کام ہیں ، اگر اس کی تجھے طاقت نہ ہو تو بھوکے کو کھلا ، پیاسے کو پلا ، نیکیوں کا حکم کر ، برائیوں سے روک ، اگر اس کی بھی طاقت نہ ہو تو سوائے بھلائی کے اور نیک بات کے اور کوئی کلمہ زبان سے نہ نکال “ } ۔ ۱؎ (مسند احمد:299/4:صحیح) «ذِی مَسْغَبَۃٍ» کے معنی ہیں بھوک والا ، جبکہ کھانے کی اشتہا ہو ، غرض بھوک کے وقت کا کھلانا اور وہ بھی اسے جو نادان بچہ ہے سر سے باپ کا سایہ اٹھ چکا ہے اور اس کا رشتہ دار بھی ہے ۔ { رسول اللہ صلی اللہ علیہ وسلم فرماتے ہیں ” مسکین کو صدقہ دینا اکہرا ثواب رکھتا ہے ، اور رشتے ادر کو دینا دوہرا اجر دلواتا ہے “ } ۱؎ (سنن ترمذی:658،قال الشیخ الألبانی:صحیح) یا ایسے مسکین کو دینا جو خاک آلود ہو ، راستے میں پڑا ہوا ہو ، گھر ور نہ ہو ، بر بستر نہ ہو ، بھوک کی وجہ سے پیٹھ زمین دوز ہو رہی ہو ، اپنے گھر سے دور ہو ، مسافرت میں ہو ، فقیر ، مسکین ، محتاج ، مقروض ، مفلس ہو ، کوئی پرسان حال بھی نہ ہو ، اہل و عیال والا ہو ، یہ سب معنی قریب قریب ایک ہی ہیں ۔ پھر یہ شخص باوجود ان نیک کاموں کے دل میں ایمان رکھتا ہو ان نیکیوں پر اللہ سے اجر کا طالب ہو جیسے اور جگہ ہے «وَمَنْ أَرَادَ الْآخِرَۃَ وَسَعَیٰ لَہَا سَعْیَہَا وَہُوَ مُؤْمِنٌ فَأُولٰئِکَ کَانَ سَعْیُہُم مَّشْکُورًا» ۱؎ (17-الإسراء:19) ’ جو شخص آخرت کا ارادہ رکھے اور اس کے لیے کوشش کرے اور ہو بھی با ایمان تو ان کی کوشش اللہ کے ہاں مشکور ہے ‘ ۔ اور جگہ ہے «مَنْ عَمِلَ صَالِحًا مِّن ذَکَرٍ أَوْ أُنثَیٰ وَہُوَ مُؤْمِنٌ فَلَنُحْیِیَنَّہُ حَیَاۃً طَیِّبَۃً» ۱؎ (16-النحل:97) الخ ، ’ ایمان والوں میں سے جو مرد عورت مطابق سنت عمل کرے یہ جنت میں جائیں گے اور وہاں بے حساب روزیاں پائیں گے ‘ ۔ پھر ان کا وصف بیان ہو رہا ہے کہ ’ لوگوں کے صدمات سہنے اور ان پر رحم و کرم کرنے کی یہ آپس میں ایک دوسرے کو وصیت کرتے ہیں ‘ ۔ جیسے کہ حدیث میں ہے { «الرَّاحِمُونَ یَرْحَمہُمْ الرَّحْمَن اِرْحَمُوا مَنْ فِی الْأَرْض یَرْحَمکُمْ مَنْ فِی السَّمَاء» رحم کرنے والوں پر رحمان بھی رحم کرتا ہے ، تم زمین والوں پر رحم کرو آسمانوں والا تم پر رحم کرے گا } ۔ ۱؎ (سنن ابوداود:4941،قال الشیخ الألبانی:صحیح) اور حدیث میں ہے { «لَا یَرْحَم اللَّہ مَنْ لَا یَرْحَم النَّاس» جو رحم نہ کرے اس پر رحم نہیں کیا جاتا } ۔ ۱؎ (صحیح بخاری:7376) ابوداؤد میں ہے { «مَنْ لَمْ یَرْحَم صَغِیرنَا وَیَعْرِف حَقّ کَبِیرنَا فَلَیْسَ مِنَّا» جو ہمارے چھوٹوں پر رحم نہ کرے اور بڑوں کے حق کو نہ سمجھے وہ ہم میں سے نہیں } ۔ ۱؎ (صحیح بخاری:3350) پھر فرمایا کہ ’ یہ لوگ وہ ہیں جن کے داہنے ہاتھ میں اعمال نامہ دیا جائے گا اور ہماری آیتوں کے جھٹلانے والوں کے بائیں ہاتھ میں اعمال نامہ ملے گا ، اور سر بند تہہ بہ تہہ آگ میں جائیں گے ، جس سے نہ کبھی چھٹکارا ملے گا نہ نجات نہ راحت نہ آرام ، اس آگ کے دروازے ان پر بند رہیں گے ‘ ۔ مزید بیان اس کا سورۃ «وَیْلٌ لِّکُلِّ ہُمَزَۃٍ لٰمَزَۃٍ» (104-الہمزۃ:1) ، میں آئے گا ان شاءاللہ ۔ قتادہ رحمہ اللہ فرماتے ہیں ” مطلب یہ ہے کہ نہ اس میں روشنی ہو گی ، نہ سوراخ ہو گا ، نہ کبھی وہاں سے نکلنا ملے گا “ ۔ ابوعمران جوئی رحمہ اللہ فرماتے ہیں کہ ” جب قیامت کا دن آئے گا ، اللہ حکم دے گا اور ہر سرکش کو ، ہر ایک شیطان کو اور ہر اس شخص کو جس کی شرارت سے لوگ دنیا میں ڈرتے رہتے تھے ، لوہے کی زنجیروں سے مضبوط باندھ دیا جائے گا ، پھر جہنم میں جھونک دیا جائے گا پھر جہنم بند کر دی جائے گی ۔ اللہ کی قسم کبھی ان کے قدم ٹکیں گے ہی نہیں اللہ کی قسم انہیں کبھی آسمان کی صورت ہی دکھائی نہ دے گی اللہ کی قسم کبھی آرام سے ان کی آنکھ لگے گی ہی نہیں اللہ کی قسم انہیں کبھی کوئی مزے کی چیز کھانے پینے کو ملے گی ہی نہیں “ ۔ ( ابن ابی حاتم ) سورۃ البلد کی تفسیر ختم ہوئی ۔ «فالْحَمْدُ لِلّٰہ» «وَلِلہِ الْحَمْد وَالْمِنَّۃ»